Açıq Azərbaycan Təşəbbüsü (Open Azerbaijan Initiative – OAI) 16 fevral 2016-cı ildə təsis edilib. OAI qeyri-kommersiya prinsipləri əsasında fəaliyyət göstərən vətəndaş cəmiyyəti təşkilatıdır.
Vizyonumuz
Dövlət qurumlarının qanunun aliliyinə riayət etdiyi, dövlət hakimiyyətinin dürüstlük, hesabatlılıq, insan hüquqlarına, informasiya azadlığına və vətəndaş iştirakına hörmət prinsipləri əsasında həyata keçirildiyi şəffaf və ədalətli Azərbaycan.
Missiyamız
Vətəndaş cəmiyyətini gücləndirmək və vətəndaşların ictimai həyatda fəal iştirakını təşviq etməklə Azərbaycanda yaxşı idarəetməni təşviq etmək, korrupsiyaya qarşı mübarizə aparmaq, qanunun aliliyini və demokratik institutları möhkəmləndirmək.
Əsas dəyərlərimiz
Şəffaflıq və hesabatlılıq - Biz inanırıq ki, qərarların açıq şəkildə qəbul edilməsi, informasiyanın əlçatanlığı və ictimai nəzarət dövlətə etimadın formalaşması üçün vacib şərtlərdir. Dövlət vəzifəli şəxsləri istisnasız olaraq vətəndaşlar, qanun və etik normalar qarşısında cavabdehlik daşımalıdırlar.
Dürüstlük - Biz dövlət qurumlarının fəaliyyətində, dövlət vəsaitlərinin xərclənməsində, dövlət satınalmalarında və ictimai həyatda dürüstlüyü, peşəkarlığı və etik davranışı təşviq edirik.
Qanunun aliliyi - Qanunlar hakimiyyəti deyil, insanları qorumalıdır. Biz ədalətli institutları, qanun qarşısında bərabərliyi və məhkəmə hakimiyyətinin müstəqilliyini dəstəkləyirik.
Vətəndaş iştirakı - Azərbaycanın gələcəyi fəal, məlumatlı və ictimai proseslərdə iştirak edən vətəndaşlar, eləcə də güclü vətəndaş cəmiyyəti institutları tərəfindən formalaşdırılır.
İnsan hüquqları - Sosial-iqtisadi hüquqlar, informasiya azadlığı və birləşmək azadlığı fundamental hüquqlardır. Heç kim ədalətsizlik, yoxsulluq və ya ayrı-seçkiliklə üzləşməməlidir.
Fəaliyyətimiz
Təsis edildiyi vaxtdan Açıq Azərbaycan Təşəbbüsünün layihələri dövlət idarəçiliyində şəffaflıq və hesabatlılıq, Açıq Hökumət Tərəfdaşlığı, korrupsiyaya qarşı mübarizə, vətəndaş cəmiyyəti üçün fəaliyyət məkanının daralması, mülkiyyət və digər sosial-iqtisadi hüquqların müdafiəsi məsələlərinə yönəlib.
2016-cı ildə təşkilat Azərbaycanda vətəndaş cəmiyyətinin fəaliyyət məkanının daralmasına dair hesabat hazırlayıb. Hesabatda 2014–2015-ci illərdə yerli və beynəlxalq qeyri-hökumət təşkilatlarına qarşı tətbiq edilən məhdudlaşdırıcı qanunvericilik tədbirləri, cinayət təqibləri və vergi sanksiyaları təhlil olunub.
2017-ci ildə OAI Açıq Hökumətin təşviqinə dair hökumətin Fəaliyyət Planının icrasını monitorinq edib və alternativ hesabat hazırlayıb. Bu hesabat Açıq Hökumət Tərəfdaşlığının Rəhbər Komitəsinin Azərbaycanın tərəfdaşlıq çərçivəsində statusunu aşağı salmaq barədə qərarında mühüm rol oynayıb.
2016–2018-ci illərdə OAI dövlət büdcəsinin hazırlanması və icrası, eləcə də dövlət xərcləri üzərində monitorinq aparıb və alternativ hesabatlar dərc edib:
Azərbaycanın 2016-cı il dövlət büdcəsinin icrası
Azərbaycanın 2017-ci il dövlət büdcəsi layihəsinin təhlili
2019-cu ildə təşkilat “Azərbaycanda korrupsiya: Son beş il” adlı hesabat dərc edib. Hesabatda hökumətin korrupsiyaya qarşı mübarizə siyasəti və bu sahədə beynəlxalq öhdəliklərinin icrası təhlil olunub.
2022–2023-cü illərdə OAI Azərbaycanda sosial hüquqların vəziyyətinin monitorinqini aparıb və illik hesabatlar hazırlayıb.
Azərbaycanda sosial hüquqların vəziyyətinə dair hesabat
Media və informasiya işi
Açıq Azərbaycan Təşəbbüsü geniş auditoriyaya malik sosial media platformalarını da idarə edir.
Bunlara 90 mindən çox izləyicisi olan Açıq Azərbaycan Facebook səhifəsi, 32 mindən çox izləyicisi olan Instagram səhifəsi və 28 mindən çox abunəçisi olan YouTube kanalı daxildir.
Açıq Azərbaycan jurnalist araşdırmaması materialları hazırlayır, ekspert bloqları dərc edir, ölkənin aktual siyasi, iqtisadi və sosial problemlərinə dair canlı müzakirələr yayımlayır, hekayə əsaslı videolar və infoqrafikalar hazırlayır.
Təşkilat həmçinin onlayn media fəaliyyəti göstərir, müxtəlif platformalarda xəbərlər, analitik materiallar və özünün hazırladığı digər məzmunları dərc edərək geniş auditoriyaya çatdırır.
Rəsmi veb-sayt: openazerbaijan.org